Մի մարդ գիշերեց հյուրատանը։ Սեփականատերը ձիուն կապելու սյուն չուներ։ Հյուրը իր հղի ձիուն կապեց տանտիրոջ սայլին և գնաց քնելու։ Գիշերը ձին քուռակ ծնեց։ Առավոտյան սեփականատերը դուրս եկավ բակ և տեսավ քուռակին։ Նա ուրախացավ և բարձրաձայնեց, որ իր սայլը քուռակ է ունեցել։ Հյուրը, տեսնելով քուռակին, ասաց, որ քուռակը ձիուն է։ Նրանք վիճեցին և որոշեցին գնալ դատավորի մոտ՝պարզելու, թե ով է ճիշտ։
Դատավորը տանը չէր։ Դատավորի կինը դուրս եկավ մուտքի մոտ և հարցրեց․
- Ի՞նչ եք ուզում դատավորին հայտնել։ Ինչո՞ւ եք եկել։
Տղամարդիկ պատմեցին եղելությունը։ Կինը լսեց նրանց և ասաց.
- Դուք պետք է սպասեք դատավորին: Նա գնացել է կորեկի դաշտից ձկներին քշելու և շուտով կվերադառնա։
- Ի՞նչ ես խոսում, տիկին, -միաձայն բացականչեցին վիճողները,- Ինչպե՞ս կարող է ձուկը դուրս գալ ծովից և մտնել կորեկի դաշտ:
- Դա նման է այն փաստին, որ քուռակը կարող է սայլից ծնվել, այնպես որ քուռակին հանձնիր այս մարդուն,- պատասխանեց դատավորի կինը։
Այդպես էլ արեցին, սակայն, երբ դատավորը վերադարձավ, նրանք պատմեցին, թե ինչպես է նրա կինը խառնվել վիճաբանության մեջ, նշելով, որ այդպես կինը խաղացել է վերջինիս պատվի հետ, քանի որ դատը տղամարդու գործ է։ Զայրացած դատավորը որոշեց կնոջը վռնդել տնից։
- Դու ինձ վիրավորեցիր,- ասաց նա,- այլևս չես կարող մնալ իմ տանը: Գնա ծնողներիդ տուն: Սակայն մինչ գնալդ, դու կարող ես վերցնել այն ամենը, ինչ գրավում է քո ուշադրությունը։
-Լավ,-ասաց կինը, - ես կգնամ, բայց թույլ տուր, որ յոթ օր խնջույք կազմակերպեմ քո տանը։
- Լավ, համաձայն եմ,— պատասխանեց ամուսինը։
Ամբողջ գյուղը հրավիրեցին։ Յոթ օր ու յոթ գիշեր խմեցին ու կերան, պարեցին ու զվարճացան։ Բոլոր յոթ գիշերները դատավորն աչք չփակեց։ Երբ խնջույքն ավարտվեց, հյուրերը հեռացան, իսկ դատավորը պառկեց քնելու։
Կինը ծառաներին հանձնարարեց, որ ցուլերին կապեն սայլին, իսկ քնած ամուսնուն պարկեցնեն սայլի մեջ։ Սայլը ամուսնուն և կնոջը տարավ վերջինիս ծնողների տուն։
Դատավորը երկար քնեց, իսկ երբ արթնացավ, չհասկացավ, թե որտեղ է։
-Որտե՞ղ եմ ես, - հարցրեց վերջապես նա։
- Դու քո կնոջ ծնողների տանն ես, - պատասխանեցին նրան։
Դատավորը հրամայեց կանչել կնոջը։
- Հիմա, դու ինձ հետ ավելի վատ վարվեցիր, քան առաջին անգամ», - ասաց նա: Ինչո՞ւ ինձ այստեղ բերեցիր։
- Դու ինքդ թույլ տվեցիր ինձ հետ վերցնել այն, ինչ գրավում է իմ ուշադրությունը, - պատասխանեց կինը, - Ինձ միայն դու ես պետք:
Դատավորը մտածեց. <<Իզուր լսեցի նրանց, քիչ էր մնում կորցնեի նման ողջամիտ կնոջը>>։
Նա հրամայեց կապել սայլը և կնոջ հետ միասին վերադարձավ տուն։
No comments:
Post a Comment